Testo Tischlein-deck-dich-altersheim-tango Bap

Tischlein-deck-dich-altersheim-tango

Letz wohr ich em Phantasialand, doch Lück, dat hann ich nit jekannt! Ich wohr wohl "maso", nit janz clean, mich krääte kein zehn Pääd mieh hin.
Ich benn noch immer konsterniert, vüür allem vun dämm wat passiert en dä Abteilung "streng geheim" vum "Tischlein-deck-dich-Altersheim"! He krääje non-stop Gnadenbrot, all die unsterblich sinn statt duut.
He levve nit-jesturvene Lück, manch einer zwangsernährt bess hück, he vegetieren vüür sich hin, selvs he dä Prinz met Duppelkinn un andrerseits, och dat steht fess: Hänsel un Gretel em Inzest! Dat ärme Spieglein ahn der Wand verliert su langsam dä Verstand, weil et die hässliche Stiefmamm nit länger mieh belüje kann.
Sterntaler hätt kein Kohle mieh, dä Rögge dät vum Bügge wieh, selvs Hans em Glöck hätt nur noch Pech: "Ich wöhr ahm leevste duut, nä echt!" Dä Wolf friss jeden Daach die Oma, doch nit vüür Hunger (stets em Koma), denn sing Verdauung weed vereitelt, die Ahl weed pausenlos recycelt.
Kaum dat dä Wolf nohm Esse schlööf, küüt janz vun selvs, nit dat mer'n rööf, dä Förster, höllt se widder russ.
Dat ess ne Wolf met Reissverschluss! En der Kantin "waat op Godot", Pinocchio un treck sich zo, hällt et als Hampelmann nit uss, hätt permanent dä "Holzwurm-Blues".
Doch en Frau Holle's Lazarett kritte "wenn sich sein Eslein streckt" als en Art Allzweckmedizin en Infusion Adrenalin.
Do op dä Intensivstation litt, nur begleitet met ner Krohn, dä ahle König, friert un nickt: Ich fingk ming neu Klamotte schick! Ze saare hätte längs nix mieh, jing en dä Bozz die Monarchie! Se kohm beim Fußvolk nimieh ahn: All wollte leever Maoam! Nur einer söök un weed nit fruh sich neuerdings em "Who is who".
Ihm stingk, dat hück kein Sau mieh weiß, wiesu hä Rumpelstelzche heiß.
Och die Prinzessin hätt et schwer: Wo kumme bloss die Frösch all her, nemmp dann die Büzzerei kein Engk eh nit ming Schnööß en Franze hängk? Die miehßte övverhaup hann't satt, sinn keine Sinn mieh, affjefuckt.
Ihr einzje Hoffnung määt mich bang: Dä atomare Unterjang! Wat mich betreff, ich hoff sickher, ich maach kein traumhafte Karrier, denn ich will nit, dat wöhr gemein, nohm Troubadoure-Altersheim! Ahm Engk m'em Heino, Roberto Blanco, Erik Sylvester, Geschwister Kessler, Roy Black, me'm Thomas Heck, Costa Cordalis, Lena Valaitis, Heintje, Wencke, Gitte (Bitte!).....